Si falamos de democracia participativa tenemos que dirnos al S V a.C (el sieglu de Pericles) onde la ciudá-Estáu d'Atenas establecio lo que se conoz como democracia ateniense.
Esta forma de gobernar nun ye precisamente un exemplu a siguir en cuantes a derechos de la xente (nun yeren eleiciones universales, tan solo elexien los "ciudadanos", varones, mayores de 20 años y qu'aportaren los impuestos correspondientes) pero la participación d'una parte importante de los atenienses foi notable, llegando incluso a tener Conceyos y/o Asamblees de más de 6.000 persones (dafechu habilitose el quorum 6000 en dalguna dómina pol gran númberu de persones que participaben).
Una de les cuestiones más curioses (y atrayentes) ye sobro lo conceición de la sociedá ateniense no cincante a los cargos electos, estos yeren nun 90% elexios por sorteu ya que consideraben que yera lo más democráticu y evitaben elexir a los más ricos, ellocuentes o carismaticos nunes elleciones por votación. Sigún pallabres d'Aristoteles suponía “gobernar y ser gobernado por turnos” (Política 1317b28-30).
El 10% restante correspondía a persones elexies por votación no cincante a asuntos d'Ayalguería, aparte los xenerales que yeran designaos pa falar sobro asuntos de guerra (ye una dómina belicista ente les diferentes ciudaes-Estáu ya otres civilizaciones).
Pa evitar que los cargos elexios por sortéu nun tuvieren al altor de les consideraciones polítiques que se-yos pidien, habilitaben unos mecanismos grupales, onde les persones elexies desendolcaben la so llabor n'equipos, esto ye, yeren asesoraes pal correutu furrulamientu del cargu establecíu por otres persones con conocimientu na matería. Más que la incompetencia, paez ser qu'a los atenienses lo que más-yos pruyía yera la tendencia a utilizar el cargu como una forma d'acumular poderes.
En definitiva, na democracia ateniense'l cargu políticu suponía un serviciu al ciudadanu, evitando d'esta mena, la perpetuación nos cargos (ya qu'eren elexios por un tiempu llimitáu), les lluches de poder internes (nun esistien partidos políticos) y la corrupción política (habilitando mecanismos pa ello, de control ciudadanu tresparentes).
Y la lluna le pregunto;
¿Por qué lloras moza melguera?
Porque llevote dientru de mi y les mios llárimes reflexen nos mios güeyos la to guapura que quiero enseñate.
Dempués de vivir media vida, de sintir que'l tiempu cuerre pente l'arume del orbayu nun llugar onde'l borrín ye la semiente d'un nuevu día, de vivir milenta situaciones onde les apariencies gobiernen la plenitú de les nueses aiciones, llega un día onde te das cuenta que lo que foi o lo que ye, nun ye lo mesmo que lu que soi, tan solo ye un espeyu de lu que quisieron que fora cola permisividá d'un alma encadarmada al devenir de los tiempos modernos.
Cualesquier día espertaremos d'un suañu prefabricáu pol sistema y nos daremos cuenta que la hestoría ta escrita polos vencedores, pero la nuesa escribese col nueso coral, tan imperfecta, pequeña,... pero enllena de valores (los que deprendimos pol camín),d'autenticidá, la nuesa esencia, los nuesos erros y sobro too, única.
Porque lo que somos ye frutu de lo que facemos y si tamos hoi equí ye poles decisiones que tomamos nel pasáu, hasta qu'n día nos damos cuenta que lo desconociu ta dientru de nós y conocenos a nós mesmos ye un actu de deslealtá al sistema. Poro, sintimos mieos de nun ser aceptaos pola sociedá que nos moldeo un llugar pente la multitú, la ignominia ye'l castigu pola ofensa al Dios censor.
El cambíu ta ehí, dientru de cada persona y nun ye más qu'escuchar el nueso corazón y siguir el camín haza la felicidá, failo tuyu.
Una tarde soleyera taba sentáu nun bancu del parque Ferrera frente al estanque de los coríos, cisnes y perques, cuando me decate que dos corios n'actitú ofensiva taben engarrandose, momentu que non duru enforma, pa dempués dixebrase en direcciones opuestes y esnalar pa soltar esa enerxía qu'inda-yos quedaba de la engarradiella anterior. Pasáu un tiempu vuelven cruciase, mirandose como si nun asocediera nada.
Quede perplexu pensando que si los coríos tuvieren una mente humana, un ego o pensamientu artificial, este sería'l desenllaz dempués de la engarradiella;
" Esi de que va, ye increible qu'inda tenga'l valor de pasar a unos centimetros del mio. Créese qu'esti estanque ye so, nun respeta'l mio espaciu priváu, esi coríu nun tien el mio enfotu, amás seguro que lo fixo pa buscar espolín, voi pensar dalguna cosa por que se alcuerde bien de la mio"
Y asina seguira la mente cola pesada carga díes, meses, años... Esa enerxía emocional que se xenera en pensamientos ye ego. Perdimos l'aldu de la vida y d'el nuesu "yo" real, cambiandolo por un "yo y la mio hestoria" que nos anula como Ser.
Quiciabes sía al momentu de "esnalar" o dichu más humananmente "llibranos de la pesada carga de les nueses hestories" y volver al únicu llugar de poder, el momentu presente.
Too lo importante na vida, tenemoslu nes nueses manes.
